Jack ta’ Darba, dramm qsajjar ta’ Leanne Ellul li jwaħħad it-traġiku mal-komiku. Huwa dramm mimli kuntrasti li jesplora l-frammentazzjoni permezz tar-relazzjoni bejn Gemma, mara anzjana bid-dimensja, u Jessie, l-infermiera żagħżugħa li tieħu ħsiebha. Iż-żewġ karattri jieħdu iktar minn irwol wieħed u għalhekk ir-relazzjoni ta’ bejniethom issir iżjed dinamika u kumplessa. Dir-relazzjoni twassal biex tirrifletti l-imgħoddi ta’ karattri li bis-saħħa tagħhom insiru nafu iżjed dwar iż-żewġ protagonisti. Gemma titbandal bejn il-preżent u l-imgħoddi. Kemm il-preżent, kif ukoll l-imgħoddi jiċċajpru kontinwament permezz ta’ memorji marbutin mal-imħabba ta’ Gemma, it-tluq ta’ seħibha Andrew, it-trobbija ta’ Anna, u x-xorb; kollha mumenti li jerġgħu jitilgħu fil-wiċċ u jagħtuha identità. Jessie hija mimlija ħajja u tagħni lil Gemma anke jekk f’waqt wieħed kruċjali ħajjithom tispiċċa fil-periklu. Fil-bidu u fl-aħħar tad-dramm toħroġ l-ossessjoni ta’ Gemma bin-nar; fil-bidu bħala simbolu ta’ wens, u fl-aħħar bħala xewqa ta’ ritorn lejn l-imgħoddi daqskemm tmiem li jtemm it-tbatijiet kollha.